TAWA YAWANOA MAAFISA IKOLOJIA NA UJIRANI MWEMA

TAWA YAWANOA MAAFISA IKOLOJIA NA UJIRANI MWEMA

Mamlaka ya Usimamizi wa Wanyamapori Tanzania (TAWA) imekutana na kufanya kikao kazi na Maafisa Ikolojia na Ujirani mwema kutoka Kanda za Uhifadhi zinazoisamamia.

Kikao kazi hicho kimefanyika leo Novemba 16, 2022 katika Wilaya ya Kilombero, Mkoani Morogoro kwa lengo la kuwapatia mafunzo Maafisa hao ili waweze kuongeza ufanisi katika utekelezaji wa majukumu yao.

Akizungumza katika ufunguzi wa kikao kazi hicho, Kamishna Msaidizi Mwandamizi anayehusika na shughuli za tafiti, ikolojia na ujirani mwema, Gloria Bideberi amesema "kikao kazi hiki kimelenga kufahamu majukumu yenu kwa ufasaha na kuweka mpango mkakati wa utekelezaji wa shughuli za utoaji wa elimu kwa jamii na ufuatiliaji wa mifumo ikolojia katika kanda tunazosimamia"

Vilevile mafunzo haya yanalenga kuhakikisha wananchi wanaoishi pembezoni na maeneo ya hifadhi wanapatiwa elimu zaidi juu ya umuhimu wa shughuli za uhifadhi na jinsi ya kujilinda na wanyamapori wakali na waharibifu.

Kamishna Bideberi ameongeza kuwa sambamba na mafunzo hayo, TAWA itafanya ziara ya utoaji elimu na kufanya tathmini ya kiikolojia katika vijiji vinavyoizunguka Pori Tengefu Kilombero."Kikubwa ni kuhakikisha rasilimali maji na wanyamapori waliopo katika Pori Tengefu Kilombero yanatuzwa vyema ili tuweze kupata maji ya kutosha yatakayotosheleza kwenye uzalishaji wa umeme katika Bwawa la Nyerere na kuhakikisha mifumo ikolojia inafanya kazi vizuri" amesema Kamishna Bideberi.

Naye, Kamishna Msaidizi wa Uhifadhi, Nyanda za Juu Kusini Japhary Lyimo ameongeza kuwa utoaji wa elimu utakaofanyika baada ya kikao kazi hiki katika vijiji vinavyoizunguka Pori Tengefu Kilombero ni matokeo ya utekelezaji wa Maazimio tisa (9) ya Kikao Kazi cha Mkuu wa Mkoa wa Morogoro na wadau wa Uhifadhi wa Bonde la Kilombero kilichofanyika Julai 8, 2022, katika Wilaya ya Kilombero. Maazimio hayo yalilenga kutatua changamoto zinazolikabili Bonde la Mto Kilombero na kuweka makubaliano ya pamoja na wadau wa uhifadhi katika utatuzi wa changamoto hizo.